कानेपोखरी। नेपाली कम्युनिष्ट आन्दोलनका संस्थापक पुष्पलाल श्रेष्ठको ४७ औं स्मृति दिवसको अवसरमा अखिल नेपाल राष्ट्रिय स्वतन्त्र विद्यार्थी युनियन (क्रान्तिकारी) कानेपोखरी गाउँ समिति र रमाइलो क्याम्पस समितिको आयोजनामा वृक्षारोपण तथा अन्तरक्रिया कार्यक्रम बुधबार सम्पन्न भएको छ।

रमाइलो बहुमुखी क्याम्पस प्रांगणमा आयोजित उक्त कार्यक्रम मनिष गुरागाइको अध्यक्षतामा सम्पन्न भएको थियो। कार्यक्रममा प्रमुख अतिथिका रूपमा नेकपा (माओवादी केन्द्र) का केन्द्रीय सदस्य जयराज सम्योक लिम्बू सहभागी थिए। कार्यक्रममा प्रदेश महासचिव नयन राई, कानेपोखरी गाउँपाटी इन्चार्ज अम्बिका अर्याल र स्थानीय अग्रज नेता भोजबिर माझी वक्ताका रूपमा सहभागी भएर विचार राखेका थिए।

कार्यक्रममा सहभागी वक्ताहरूले पुष्पलाल श्रेष्ठले नेपाली कम्युनिष्ट आन्दोलन र जनताको मुक्तिका लागि पुर्‍याएको योगदानबारे चर्चा गर्दै उनको सपना पूरा गर्न विद्यार्थी आन्दोलन सशक्त बनाउनुपर्नेमा जोड दिएका थिए। कार्यक्रममा पुँजीवादी अन्तरविरोध, वर्गीय चेतना र आत्मनिर्भर अर्थतन्त्र सम्बन्धी विषयमा विशेष अन्तरक्रिया गरिएको थियो।

कार्यक्रममा बोल्दै प्रमुख अतिथि जयराज सम्योक लिम्बूले “विद्यार्थी आन्दोलनलाई संगठित र सशक्त बनाएर राजनीतिक परिवर्तनलाई संस्थागत गर्न विद्यार्थीहरूको भूमिका महत्वपूर्ण रहने” बताए। प्रदेश महासचिव नयन राईले पुँजीवादी प्रणालीले निम्त्याएको विसंगति र वर्गीय शोषण विरुद्ध सचेत हुन विद्यार्थीहरूलाई आग्रह गरे। अम्बिका अर्याल र भोजबिर माझीले विगत को राजनीतिक अवस्था र समाजवाद बारे चर्चा गरे।

कार्यक्रम सफल बनाउन रमाइलो क्याम्पसका स्ववियु सभापति तथा अखिल (क्रान्तिकारी) का जिल्ला सह-सचिव अनिश कार्कीले विशेष भूमिका निर्वाह गरेका थिए। उनका अनुसार स्मृति दिवसको अवसरमा क्याम्पस प्रांगणमा फलफूल र छायाँ दिने विभिन्न प्रजातिका बोटहरू रोपिएको छ, जसले वातावरण संरक्षणसँगै क्याम्पसलाई हरियाली बनाउन योगदान पुर्‍याउनेछ।

कार्यक्रममा विद्यार्थी, स्थानीय समुदाय, पाटीका नेता र संगठनका प्रतिनिधिहरूको उल्लेखनीय उपस्थिति रहेको थियो। सहभागीहरूले यस्ता कार्यक्रमहरूले राजनीतिक चेतना अभिवृद्धि गर्नुका साथै विद्यार्थीहरूमा सामाजिक उत्तरदायित्वबोध समेत जागृत गर्ने बताएका थिए।

प्रतिक्रिया

सम्बन्धित खवर

ताजा समाचार

लोकप्रिय